آآه يا برادعي

آآه يا برادعي
شِد القلوووع.. يا برادعي
مفيش رجوع.. يا برادعي
آآه يا برادعي
آآه يا قلبي

حكايات زمان

مالك يا قلبي
سامعك بِتْئِن
سامعك لكن مش لاقيك
خلاص خلصت حكاويك
ولا تاه حبيبك
وراح حنينك
ومََفضلشِي غير الأنين
وشوية عناوين
وأرقام تليفون
مش عارف بتوع مين
طب لسه فاكر غناويك
ولا نسيت مع السنين
طب وأحلام زمان
واللعب أُدَّام الدكان
وصاحبك سوسو
وحكايات إسمها إيمان
طب فاكر أم نعمات
اللي بتربي أيتام
وعم أبو صالح
وغالية وحماصة
وزينة رمضان
طب فاكر نادية
أم شعر أصفر
وعيون خضرا
ومدرسة عزيز
واللعب اللذيذ
وعم محمد بتاع الفول
و شارع النجوم
وأولاد مرزوق
وصيادين السمك
وكورة في الصندوق
ونوي المشمش
والواد فِرفِشْ
وحكاية سميرة معاك
والمذاكرة جنب الشباك
ومنشية التحرير
وشلة الكورة
وسماح ووفاء وأيمن سمير
طب فاكر رحلة إسكندرية
وتعال نغرق شوية
والواد اللي سرقنا في المية
وسفرية مطروح
مع شلة الجوع الكافر
ولعبة الباشمهندس
وخش الحمام وتربس
ولما فتحت المندل
وطلعت بتحب صندل
يا قلبي إضحك بَأَه
إنسي اللي واجعك
وإفتكر اللي حَبَّكْ
يمكن المكتوب تعيش غريب
لكن متنساش إنك حبيب
والحبيب قلبه بيضحك
ودايماً قريب

يا فجر

والله يا فجر إن ماطلعتش

لأطلع أجيبك

لو ورا ١٠٠ ليل أنا هامشيهم

مش راح أسيبك

هامشي عالجمر واتحمل

مش هايأس أبدا وهاكمل

وضروري في يوم سهمي يصيبك

خطوة ورا التانية

خطوة ورا التانية

الصعب يهون

وهاكون عاقل في زمن مجنون

دنيا ومش دايم حليها

هاقدر عالمر أحليها

والله يا فجر إن ماطلعتش لأطلع أجيبك

هامشي عالجمر واتحمل

مش هايأس أبدا وهاكمل

وضروري في يوم سهمي يصيبك

منقول

أضعف من نفسي

لما صحيت كالعادة براحتي
و بصيت في مرايتى
شفت واحد تاني
قربت شوية وبصيت تاني
وكأني مش عارفني
إفتكرت النهاردة عيد ميلادي
وحسيت وكأن زماني
مع كل يوم بيعدي
بيرسم خط في وشي
ويسيب علامة في جسمي
يا تري باقي أد إيه مني
يا تري هاعيش أد اللي عاشني
وفجأة شعور ملكني
شعور خايف خوفني
ده ميعاده قرب مني
يوم ما يعاتبني
وحسيت بحنين شوقني
نفسي أفضفض وأبكي
عايز أبوح بالمكنون مني
يا تري هيلومني ويوبخني
ولا هيحضني ويسمعني
مفيش غيره هيفهمني
عايز أحكيله علي ندمي
عايز أقوله علي غلطي
وإن الحمل تعبني
عارف إيه هايقولي
إن مفيش أقوي مني
مع إن مفيش أضعف مني
بس الشهود كلها ضدي
الكل هيشهد ابن آدم هزمني
الجبل هيقول ده كسرني
وأخد الكنوز من بطني
والبحر هيقول ده ركبني
وفي شباكه إصطادني
والريح هتقول ده منعني
وبني حصون تكسرني
والسما هتقول ده ملكني
وبجناحه طار ونفثني
أنا قهرت كل اللي عاندني
وطوعته يطاوعني
كل الشهود ضدي
لكني يا ربي
كنت أضعف من نفسي
أشدها لهداك تشدني تضيعني
حبيتها وكرهتني
إديتني مفتاحها وضاع مني
ونسيت أمانتي ونسيتني
أنا كنت ظالم وأناني
يا تري هاتسامحني
دمعة فرت من عيني
من شرودي فوقتني
لاقيتني لسه بحلق ذقني
ده صحابي مستنيني
النهاردة عاملين بارتي
عشان عيد ميلادي
أنا إيه اللي أخرني
بسرعة خلصت حمامي
وغصت في هدومي وبرفاني
وطرت ألحق أصحابي
إفتكرت وأنا علي بابي
إني ما صليتشي صلاتي
إترددت ثواني
إفتكرت شرودي وهذياني
أقاوم ضعفي ويغلبني
ترددي طال أخرني
هابقي أصلي لما آجي
وفي سكتي وأنا ماشي
وطول ليلي ونهاري
لوم وندم ملازمني
إزاي يا نفسي تلوميني
وإنتي اللي هويتيني
للعب واللهو بتشديني
يارب أنا تعبان ريحني
مين فينا اللي غواني
أنا ولا نفسي اللي كارهاني

وتحسبهم أغنياء من التعفف

يا سكر الأرض .. يا عبير الأرض .. يا روح الأرض
آآآآه يا وجعي .. يا وجع القلوب .. يا وجع النايات
أيتها الريحانة .. يا زهرة بساتين الجنة
أيتها الحبيبة و القريبة .. يا من عشتي غريبة
ليس لي مكان في عدن لجوارك
وكأنك استأثرت وحدك بحب الله
لم يعد لي وجود
لم يعد لوجودي معني اذا نسيتك
لم يعد للحياة وجود
الأحزان تلاشت أمام دموعك
وضاعت الأحلام والذكريات والأفراح
لم يبقي سوي أصداء نبراتك
تجلجل في أركان كياناتي
ربنا معايا .. هو وحده معايا
الحمد لله .. الحمد لله .. الحمد لله

يا قلب يا أمير

يا تري يا قلبي لسه زي زمان

نفسك تطير

وبتدور علي جناحين

وعش في أعلي مكان

وعايز تلعب مع العصافير

يا تري لسه جواك نفس الأحلام

رغم طول الأيام

أنا فاكرك لما كنت صَغْير

لسه عايش أحلامك

وخايف أوهامك

ولسه باعشق ألوانك

وفاكر كلامك إن الحب ده خطير

يا تري لسه بتهرب من البنات

ومالَكْش في الغراميات

وتقول بكره.. لما أبقي كبير

وكبرت يا قلبي

وكبرت معاك الأوجاع

وطولت المشاوير

حتي ملامحك إتغيرت

وألوانك إتبدلت

الأحمر مابقاش لون الحب

والأزرق صار لون الحزن

والأخضر فِضِلْ محبوس ورا القضبان

مستنيك تديله العنان

وتعبت يا قلبي من كتر المشاوير

تعبت من الغربة والسفر

وندمت لما هجرت الوطن

وتاهت عناوينك وسط البشر

عارفك بتحن لأرض الجدود

وخايف تخطي الحدود

هنا ضميرك صاحي

وهناك خايف يموت

لساك فاكر يا قلبي إن كل الناس أمامير

كلهم طيبين

ما تعبتش من الأسافين

ده حرامي وده منافق وده أبوه متين

لإمتي يا قلبي هتعيش عبيط

عايزين يدفنوا راسك زي النعام

ويرقصوك زي القرود

ويمشوك عالحيط

عايزين يركبوك زي الحمير

يا قلبي إفهم بأه... ده مش الزمن الجميل

ده زمن الملاعين

شكلهم قريبين... لكنهم قاسيين

مفيش في قاموسهم معني الضمير

إنساهم يا قلبي

لا هتقدر تغيرهم

ولا عمرهم يعترفوا بيك أمير

كل الناس دخلوا الجنة

إمبارح حلمت حلم غريب

حلمت إن كل الناس دخلوا الجنة

وكل واحد إتجوز حورية

--------------------

في الصبح

إبني صحاني زي كل يوم

حضنته أوي

و إتمنيت يدخل الجنة

ويتجوز حورية

وإستغربت

أول مرة أحس بكده

وبصدق.. ومن قلبي

--------------------

وبعد دش الصبح

لاقيت الفطور

وإبتسامة من وش أمور

إفتكرت الحلم العجيب

وإفتكرت كلامها

لما نخش الجنة إن شاء الله

هتجوزني أنا وحدي

طال سرحاني.. نادتني

مين أخدك مني؟

قلت.. عارفة؟

لما أخش الجنة إن شاء الله

هتجوزك إنتي بس يا عينيه

--------------------

وبعد يومين

مكالمة تليفون

فكرتني بالمرحوم

وكلام الصغير

بابا راح الجنة

إفتكرت حاجات حلوة كتير

وإتعلمت معني جديد

معني حب الحياة

وإفتكرت الحلم العجيب

ناديت صغيره في خيالي

أيوي يا حبيبي بابا في الجنة

وزمانه إتجوز حورية

مش باقي مني

3'ayar 7erof el3'ona

رسمت بالألوان

رسمت بالألوان

رسمت للعالم إبتسامة مليانة حنان

وحصان أبيض بيجري للحرية في الوديان

ورسمت موجة ناعمة هربانة من بحر غرقان

ومن فوق سحابة طايرة علي شكل إنسان

والشمس وراها بتلالي.. بالأصفر والبرتقالي

وبنت حلوة بضفيرة.. لابسة في البراءة فستان

بتجري ورا أماني بجناحات ألوان

في أرض مفرودة بأخضر فرحان

ورسمت حبيبتي واخدة الحب بالأحضان

في إيديها ورود وحكايات وأحلام

بتمد إيديها بكاس.. فيه إكسير للنسيان

والنبي إتوصي يا سحاب

يا سحاب يا أبيض بلون القطن

بتلف الدنيا وواخد السما بالحضن

إزاي لونك فرحان

وهمومك جبال ومطرك مليان حزن

بتشوف الطيب والشرير

هنا الغني وهناك فقير

وعالم عايش في هزار واستهتار

وشعوب مكوية بالحديد والنار

وناس تعبانة وبطون جعانة

وحيتان سعرانة

ونهبانا وواكلانا

يا عم سحاب

وحياة اللي سماك سحاب

ورسمك وردة وحصان وكتاب

أستحلفك بالوهاب

إتوصي شوية بالأرض الطببة

يعني شوية مطرة علي حبة ندي

يعني تعال عندنا وإستني

بلاش تجري إتأني

عايزين نخضر

وكمان نعمر

وناكل إشي محمر علي معمر

أحسن العيشة بقت مستحيلة

وأنا قليل الحيلة

وعندي عيال وعيلة

والأيام صارت طويلة

والهموم تقيلة تقيلة

والنبي إتوصي يا سحاب

أستحلفك بمسبب الأسباب

تعال اغسل الهباب

وزيح عننا التراب

نضف الضماير وطهر النفوس

رجعنا تاني صحاب وأحباب

فاروق جويدة-هذه بلاد لم تعد كبلادي

الفاتحة ع الأموات

من روائع الشاعر علي سلامه

وفضلت استني استني..
لحد ما عدي آخر قطر وفات..
حزنت قعدت أعيط أعيط..
تعبت م العياط..
قلت أتمشي أتسلي..
أتفرج ع الشوارع والناس
والعربيات..
زهقت..
قلت أرتاح..
سندت علي روحي..
اتلخبطت جوايا كل الحاجات..
مديت إيدي ف جيوبي..
لقيت شوية ورق قديم..
وصور وكروت تليفونات..
قلت أكلم مراتي..
افتكرت إنها خدت الدوا..
ونامت من تلات ساعات..
قلت أكلم أخويا..
افتكرت إنه طلع معاش مبكر..
وكاره تاريخه..
ومركز ف التأمينات..
أكلم أختي..
ها تعيد وتقول نفس الحكايات..
أكلم خالي..
افتكرت إنه غتت غتاتة..
ومعايا أنا بالذات..
أكلم خالتي..
قلت يا واد
دي كات خالتي وخالتك..
واتفرقوا الخالات..
أكلم صاحبي صلاح..
افتكرت إنه سافر العراق..
وفي احتمال يكون مات..
قلت أنا أنسي وأعمل دماغ..
بس ما عرفش حد بتاع مخدرات..
قلت أمشي ف مظاهرة..
لقيت العساكر راجعين..
مشطبين علي كل المظاهرات..
قلت أتصل بالسادة المسؤولين..
هايتهموني بإزعاج السلطات..
قلت يارب..
هو أنا إيه..
وليه..
ونسيت إيه..
وقطر إيه ده اللي فات..
الله يرحمك بقي يابا..
والفاتحة ع كل الأموات..

إبن بلدي

أشوف إبن بلدي ويملاني العجب
في الجيش انطلب
أدي ما وجب
والكبير سرقه ونهب

وظلم وفساد للركب
وباعوله السم في علب
وصبر واحتسب
وفي الآخر إنذل وإنضرب
آآآه يا قلبي

الكلام والحرية والطيران

يا تري يا وطن زعلان

واخد علي خاطرك

غضبان

يا تري بتقول عليه هربان

بأطلب السماح

حس بيه.. أنا إنسان

عندي طموح.. مليان أحلام

وعايز أعيش في أمان

وعندي إبن صغير

عايز أعلمه الكلام والحرية والطيران

مفضلشي منك غير ذكريات

شوية حجارة ونقوش وأوهام

وكتير من الآلام

حتي ناسك ياوطن

مابقوش زي زمان.. جدعان

نسوا الحب.. نسوا الإخلاص

والوطن إيه غير شوية ناس

عندهم شيء من الإحساس

لكن رغم القسوة

هافضل أحبك

هتفضل في القلب.. في الوجدان

وهتفضل في عيني أحلي الأوطان

إوعي تكون زعلان

وإفتكر إني إنسان

بيحلم بالطيران

.

.

.

. سلام

الوداع يا وطن

بعد أجازة غير قصيرة في الوطن المكلوم أعود أدراجي مرة أخري لأرض البعاد. لم أجد الوطن الذي أوحشني ووحشني. تغيرت الأرض والناس و الحياة. ألقت القسوة بظلالها علي الوجوه و القلوب والذكريات. اختفي الوطن الحبيب وأصبحت فيه غريب. حتي الأحلام ماتت وأصبحت يا وطن بلا طموح ولا وزلت تنتظر نوح وتبغي طوفان يمسح عنك كل الجروح. الوداع يا وطن.. الوداع يا أرض الأوجاع. لم يبقي منك سوي الأنين. سأغادر.. سأهاجر حتي يظل في قلبي بعض الحنين. سأزورك.. سأواسيك.. سأصلي من أجلك لكني لا أستطيع أن أعيش علي أرضك مكتوف خذلان مقهور. لا أستطيع أن أعيش كالحمار بعد أن وجدت كرامتي. سآخذ بعض الذكريات.. سآخذ بورتريه وسبحة وجمل صغير. وسأحتفظ ببعض الذكريات بعضها حلو وكثيرها مرير. وسأذكر دائما جمال الفل والياسمين وعصير القصب والخروب و رائحة البخور. ستظل في قلبي وسأظل أحبك.. لا أعرف لماذا أحبك ولا كيف والي متي سأعاني من فراقك. ما هو سرك ؟ لماذا دب في قلبي الحنين مع أول خطوة علي سلم الطائرة. كيف تحول الأنين الي حنين في لحظات. هذه المرة أتركك بقلب مكسور. أشعر أني لن أعود وسأعيش في شتات ما حييت. فقد أصبحت الوطن المستحيل. ملأك الكذب والغش والخداع. وتحولت الي تكية للأوساخ. باعوك وباعوني وباعوا كل نفيس وعزيز. لغتهم خد وهات. وحكموك بالمصالح والعمولات. قمعوك بالطوارئ والارهاب. وبخسوا ثرواتك للأعداء. ووهبوهم أرضك مقلب نفايات. نعم هذه هي الحقيقة لقد أصبحت مقلب نفايات. ربما تكون قد فقدت معني كلمة وطن. لكني سأظل مرتبطا بك سأظل أحبك سأظل أتقصي أخبارك سأظل أتوق وأشتاق اليك وأحن لمواويلك وغناويك سأظل أذوب عشقا وعذابا فيك. فلن أجد أبدا أرضا تغنيني عنك. لن أجد عالما أحبه كحبي لك. فأنت جزء كبير مني وأنا جزء صغير منك.

الوداع يا وطن.. الوداع

حنين وأنين

بين هنا وهناك احتار قلبي المشتاق
هناك حنان وحنين
وهنا ذكريات السنين
في أرضي أجد قوتي وأحكم عالمي و تزيد وسامتي
وفي غربتي تاهت وحدتي وذابت ملامحي وضاع رونقي
كيف أترك الحب والدفا
وأرتمي في أحضان من جفا
لمن أترك شمسي ونيلي وهرمي
وأذهب لبلاد بلا تاريخ ودون ماضي
لماذا أبيع أرضي
وأشتري بنقود بخسة وطن جديد
من فعل بنا هذا؟
اللعنة علي من قهرني في بلدي
اللعنة علي من اضطهدني في أرضي
ولعنات ولعنات علي ضعفي وقلة حيلتي
كيف أترك بيتي للأوغاد
كيف أترك غيطي للأوساخ
سئمت من كثرة التنازلات
وتعبت من حرقة الآهات
متي تحين ثورتي ومتي تهب عاصفتي
أين أمطاري لتغسل قاذورات الملاعين
أين رياحي لتزيل هموم المساكين
أين الزلازل .. أين البراكين
أين أحلام السنين
بين هنا وهناك .. احتار قلبي الحزين
وفضل حالة الحنين .. علي أن يعيش في أنين

مصر

مصر يا قنديل شمس نور ومنور

والقمر في هلاله أبو ابتسامه عريضه

ونيل بيجري يزغزغنا ويغسل همومنا

بلاقيكي في حنان أمي وسمرة أبويا

بلاقيكي واخواتي جنبي واصحابي حواليا

يا حكاية يوسف يا رسالة موسي

يا رحلة عيسي ووصية محمد

يا أرض الفيروز ياطوي يامقدس

ازاي أكرهك وربنا حبك

ده كل يوم بيعدي غلاوتك بتكتر

عشان كده ابني في حضنك راح يكبر

قصيدة - تبت يدا

قولوا لأمي إني راجع

قولوا لأمي إني راجع

مهما الأيام طالت

ومهما الغربة زادت

أنا راجع لأحضانك

ورافع راية وسلام

ومسلملك قلبي سماح

تعبان وجاي أرتاح

قولوا لأمي إني راجع

إحكولها عن طول الليالي

وعن سكوت الشوارع

وبرود المشاعر

وعن هجر الجيران

قولولها عن بنات ألوان

لابسين شورت وعريان

وعن قلبي الهربان

مشتاق لعفة وأحضان

وإحكولها حكاية سعد

اللي خلف ولد

الواد كبر واتمرد

وسمي نفسه مارك

قولوا لأمي إني راجع

راجع وكلي حنين

أعوض صبر السنين

ألعب كورة وأتعشي في الحسين

أسهر للصبح وأتمشي عالنيل

وأقعد عالقهوة مع مينا وأمين

وأفطر شاي وقراقيش من إيديكي الحلوين