يا عم الشاويش
بالراحة عليا.. بشويش
أنا عايز آكل عيش
ده في الغلب زيي مفيش
-----------------
يا عم الشاويش
سيبك من أبو الريش
أبو نسر اللي نافش ريش
ده مرسال الخفافيش
-----------------
يا عم الشاويش
وليه التفتيش
ده أبويا مات وأخويا في الجيش
وأمي جوه بتعمل قراقيش
وأنا... أنا مفيش
-----------------
يا عم الشاويش
يا تلحقني يا متلحقنيش
العسكر دول طرابيش
نازلين فيه تلطيش
وإيديهم زي الشواكيش
-----------------
!!! يا عم النيلة إنت
قصدي.. ياباش شاويش
ليه تصدقهم ومتصدقنيش
إحنا مش حرافيش
يمكن غلابة ورزقنا شوية ملاطيش
....... لكننا بنحب
واللي بنحبها يا عيني عليها متقوليش
