ما أقدرش أنسى
وأنا عندي من السنوات خمسة
البنت اللي اسمها شط بحور
وطيور البحر على المرسى
بتمر سنين
والقلب مع الوقت بيقسى
بس الودعة ف جيبي لسه
اللي اديتهالي شط بحور
وشوشت البحر ووشوشني
وبنيت الرمل وباش مني
وحبيبي سبح لغروب الشمس
بنادي له صوتي اتحاش مني
ومراكبي في الرملة غارزة
بس الودعة ف جيبي لسه
اللي اديتهالي شط بحور
ونسيت البحر وأيامه
والعالم خدني في زحامه
اللون الأزرق راح مني
والأصفر ساقني قدامه
وإن قلت لقلبي خلاص انسى
ألقى الودعة ف جيبي لسه
اللي اديتهالي شط بحور
بهاء جاهين
