بجد إنت يارب محيرني
جوايه أسئلة كتير مغلباني
ياريت يارب تريحني
قولي يارب يعني إيه حياة
ويعني إيه موت
وإزاي فكرت في الموت
قولي يعني إيه حياة أبدية
مش قادر أستوعب حالة اللا نهاية
يعني مفيش زمن ؟
طب يعني إيه زمن
وإزاي فكرت تخلق الزمن
يعني إيه أيام وشهور وسنين
وإزاي فكرت في كوكب وشمس وقمر
وإزاي فكرت في المطر والشجر
إيه العبقرية دي يارب
مش بقولك محيرني
طب قولي يارب
يعني إيه ملاك ويعني إيه جان
وليه كان الشيطان
وإزاي فكرت تخلق الإنسان
طب ليه خلقت الإنسان
وإنت عارف إنه هيقتل ويسرق ويظلم
عارف إنك عادل والظلم هترفعه
طب ليه الظلم من الأول
ليه الخير وليه الشر
ليه الكر وليه الفر
إيه هدفك يارب ؟
عايز توصل لإيه ؟
أنا فاكر كلامك لما قلت "كنت كنزا مخفيا فخلقت الخلق فعرفت
وأنا أشهد يارب أنك أجمل ما في الوجود
وفاكر لما قلت "وما خلقنا السماء والارض وما بينهما لاعبين
وأنا متأكد إن مرادك أعظم وأجل
وقلت كمان "ما خلقناهما إلا بالحق ولكن أكثرهم لا يعلمون
طب قولي يارب.. فهمني.. نورني..عايز مننا إيه ؟
إيه اللي إنت هتستفيده مننا في الدنيا وبعد الآخرة ؟
إيه بعد الجنة وبعد النار ؟
إيه بعد إكرام الطيبين وعذاب الأشرار ؟
نفسي أفهم حكمتك
مش بقولك يارب إنت محيرني
طب يارب قولي يعني إيه صبر
وإزاي قادر تصبر علي اللي خذلوك
واللي جحدوك واللي نكروك
إزاي بترزق العاصي والكافر والظالم
إيه كل الصبر اللي جواك ده يارب
طب قولي يارب يعني إيه بر ويعني إيه إحسان
وإزاي عايزني أعيش إنسان
وحواليه وحوش وخونة وغيلان
إنت حطتني في أصعب إمتحان
قولي يارب يعني إيه هداية
وليه إديتها لناس وناس
وليه إخترت ده مهدى وده عاصي
طب يعني إيه إيمان ويعني إيه يقين
وإزاي يكمل الإيمان بدون كامل معرفة
وإزاي يكمل اليقين والإيمان ناقصه حته
مش بقولك يارب إنت محيرني
طب قولي يارب هو يعني إيه ضمير ؟
وإيه الفرق بين إنسان وحيوان لو إنعدم الضمير
وإزاي في ناس عايشة من غير ضمير
هو إنت إزاي فكرت في الضمير
طب هو فين مكانه.. في الروح ولا العقل ولا القلب
إلا قولي يارب هو إنت عندك قلب زينا
يا تري قلبك ده كبير أد إيه
نفسي قلبي يلمس قلبك.. يا تري ممكن ؟
طب هو ممكن أترمي في حضنك
طب يارب هو إنت شكلك إيه
نفسي أوي أشوفك
لدرجة إني بخاف أكون أعبدك عشان بس أشوفك
عارف يارب أنا ليه بعبدك ؟
مش عشان أخش الجنة وأهرب من النار
لا.. أنا بعبدك عشان إنت تستاهل كده
تستاهل أحط راسي في الأرض أدامك
عارف أنا بعبدك ليه كمان
عشان نفسي أكون زي ما إنت عايز
عايزك تفتخر بيه
ببساطة كده.. ومن قلبي.. عايز أفرحك يارب
نفسي أرسم إبتسامة علي وجهك
مع إني مش عارف شكلك إيه ؟
مش بقولك يارب إنت محيرني
لكن اللي بجد محيرني
إزاي قدرت تخليني أحبك
وأنا عمري ما شفت شكلك
ياتري هو ده يقين الإيمان
مش عارف.. أو مش فاهم
ساعات كتير أصبر نفسي
وأقولها هتعرفي كل حاجة في الآخر
لكن أسئلتي محيراني وملهاش آخر
سامحني يارب إذا كنت عديت حدودي
بفضفض معاك يا مالك روحي
عارف يارب.. إنت بالنسبة ليه إيه ؟
إنت الحقيقة الوحيدة في وجودي
ورغم كده.. إنت أكبر غموض في حياتي
مش بقولك يارب أنت محيرني
ياريت تريحني
